«Манчестер Сити» бош мураббийи Хосеп Гвардиоланинг келажаги мавҳумлигича қолмоқда.
Сўнгги вақтларда матбуотда испаниялик мутахассиснинг жорий мавсум якунида — шартнома муддати тугашига бир йил қолганда жамоани тарк этиши ҳақидаги гап-сўзлар тобора авж олмоқда.
Журналист Бен Жейкобснинг маълумотларига кўра, «шаҳарликлар» раҳбарияти Гвардиолага илтимос билан мурожаат қилган: клуб бош мураббийдан вазиятга ойдинлик киритишни ва амалдаги шартнома муддати охиригача ишлаш ниятида ёки йўқлиги бўйича аниқ жавоб беришни сўраган.
Қайд этилишича, мураббийнинг келажаги билан боғлиқ ноаниқлик «Сити»га яқин орадаги трансферларни режалаштиришда халақит бермоқда. Клубда хотиржамлик сақланиб қолган бўлса-да, яқин орада Пепдан аниқ бир тўхтамни эшитишга умид қилишмоқда.
