Лондоннинг «Челси» клубида яна келишмовчилик юзага келди. Яқинда клуб ярим ҳимоячи Энцо Фернандесни Мадридда яшаш истаги ҳақидаги гаплари учун иккита ўйинга четлатишга қарор қилган эди.

MatchDay Central нашрининг хабарига кўра, «аристократлар»нинг кўплаб футболчилари аргентиналикнинг фикрларини ёқлашмаяпти, бироқ четлатиш жазосини ҳаддан ташқари қаттиқ чора деб ҳисоблашмоқда. Кийиниш хонасида «Манчестер Сити»га қарши бўладиган муҳим баҳс олдидан асосий хавбекнинг йўқлиги сабабли хавотир ҳукм сурмоқда.

Шунингдек, қайд этилишича, сардор Рис Жеймс бошчилигидаги бир гуруҳ «Челси» футболчилари мураббий Лиам Росеньор ва раҳбариятга мурожаат қилиб, жазони бекор қилишни ҳамда Фернандесга «шаҳарликлар» билан кечадиган ҳал қилувчи ўйинда майдонга тушишга рухсат беришни сўрашган.