«Манчестер Сити» вингери Антуан Семеньо «шаҳарликлар»нинг турнирлардаги мақсадлари ва клубнинг совринлар ютиш иштиёқи ҳақида ўз фикрлари билан ўртоқлашди.

«Менда ҳар бир соврин учун курашиш ёки ғалаба қозониш амбицияси бор ва айнан шундай жамоада бўлишни истайман. «Манчестер Сити»га келиб қолганимдан миннатдорман, воқеалар ривожини кузатамиз. Шахсан мен учун соврин ютиш — бу ажойиб, лекин бизнинг бу мавсумда эришмоқчи бўлган мақсад ва интилишларимиз жуда кўп. Ҳозир мавсумнинг энг муҳим палласи. Биз ўйиндан ўйинга ўтиб, иложи борича кўпроқ ғалаба қозонишни истаймиз. Энди ҳар бир баҳс биз учун финалга тенг, шунинг учун курашни давом эттиришимиз ва якунда нима бўлишини кўришимиз керак», — деди Семеньо Саймон Байковскийга берган интервьюсида.

Эслатиб ўтамиз, «Манчестер Сити» жорий мавсумда Лига Кубоги финалида «Арсенал»ни мағлуб этиб (2:0), бош совринни қўлга киритди. АПЛда «шаҳарликлар» иккинчи ўринда боришмоқда, Англия Кубогида эса ярим финалга йўл олишган. Чемпионлар Лигасининг 1/8 финалида эса «Манчестер Сити» «Реал»га имкониятни бой бериб, турнирни тарк этди.