Лондоннинг «Арсенал» жамоаси УЕФА Чемпионлар лигаси чорак финалида Лиссабоннинг «Спортинг» клуби билан тўқнаш келади. «Тўпчилар»нинг икки футболчиси — ҳимоячи Юррьен Тимбер ва вингер Букайо Сака бўлажак ўйинни ўтказиб юборади. Бу ҳақда жамоа бош мураббийи Микель Артета маълум қилди.
«Букайо ва Юррьен жамоа билан бирга кетишмади. Улар ҳали майдонга тушишга тайёр эмаслар. Агар ҳаммаси яхши бўлса, уларнинг дам олиш кунларидаги ўйинга қайтишига умид қилишимиз мумкин», — дея испаниялик мураббийнинг сўзларини иқтибос келтиради УЕФА матбуот хизмати.
«Спортинг» — «Арсенал» учрашуви бугун, 7 апрель куни Лиссабондаги стадионда бўлиб ўтади. Ўйин Тошкент вақти билан соат 00:00 да бошланади.
