Мирча Луческунинг ўғли Рэзван Луческу рафиқаси Нели ва ўғли Матей билан биргаликда 80 ёшли мутахассис ётган шифохонага етиб келди. Эслатиб ўтамиз, мураббий оғир аритмиянинг навбатдаги хуружидан сўнг сунъий кома ҳолатига ўтказилган эди.
«Бу жуда оғир дамлар ва мен ҳаммадан бу вазиятга ҳурмат билан қарашни сўрайман. Барча зарур маълумотлар тиббий ходимлар томонидан расмий манбалар орқали тақдим этиб борилади», — дея Рэзваннинг сўзларини келтирмоқда Gazeta Sporturilor.
Шифокорларнинг маълумотларига кўра, собиқ мураббийнинг аҳволи барқарор оғирлигича қолмоқда.
Эслатиб ўтамиз, 3 апрель куни Луческу ўткир миокард инфарктини бошдан кечиргани маълум бўлган эди. Ўша куни уни шифохонадан чиқариш режалаштирилган эди, чунки у 29 март куни Руминия терма жамоаси қароргоҳида аҳволи ёмонлашгани сабабли госпитализация қилинганди.
Шунингдек, 2 апрель куни Руминия футбол федерацияси Мирча Луческунинг миллий терма жамоа бош мураббийи лавозимидаги фаолияти якунланганини расман эълон қилган эди.
