Лондоннинг "Арсенал" клуби бош мураббийи Микель Артета УЕФА Чемпионлар Лигаси 1/4 финалидан ўрин олган Лиссабоннинг "Спортинг" жамоасига қарши бўлажак дастлабки ўйин ҳақида фикр билдирди. Ўйин бугун, 7 апрель куни "Жозе Алваладе" стадионида бўлиб ўтади.
"Спортинг"нинг ютуқларига, айниқса, ўз уйидаги ўйинларига, ушбу Чемпионлар Лигасида қандай ўйнаганига ва қайси жамоаларни мағлуб этганига қараб, бу ўйин қанчалик қийин бўлишини тушуниб турибмиз. Шу сабабли ҳам биз ғалаба қозонишни янада кўпроқ хоҳлаймиз.
Ўйлашимча, Виктор Дьёкереш ушбу ўйинни катта интиқлик билан кутмоқда. У ҳаяжонда ва "Спортинг"да ўтказган вақти учун ушбу клубдан жуда миннатдор. Бу унинг клуб, ўйинчилар, ходимлар ва "Спортинг"да ишлайдиган барча ҳақида гапиришидан кўриниб турибди. У ерда орттирилган тажриба унинг йўлидаги жуда муҳим қисм бўлган", — дея Артетанинг сўзларини келтиради УЕФА расмий сайти.
2025 йил июль ойи охирида Дьёкереш "Спортинг"дан Лондоннинг "Арсенал" клубига ўтган эди. Ҳужумчи Португалия клубида 2023 йил июлдан 2025 йил июлгача тўп тепган.
