"Бавария" ярим ҳимоячиси Александр Павлович Чемпионлар Лигаси чорак финали доирасида Мадриднинг "Реал" клубига қарши кечган биринчи ўйиндаги ҳаракатларига баҳо берди. 21 ёшли футболчи 93-дақиқагача майдонда ҳаракат қилди ва мюнхенликларнинг "Сантьяго Бернабеу"да қўлга киритган 2:1 ҳисобидаги ғалабасига ёрдам берди.

"Биринчи бўлимда мен бир нечта ёмон узатмаларни амалга оширдим, ваҳоланки илгари бундай хатоларга умуман йўл қўймасдим. Иккинчи бўлимда ўйиним бироз қовушган бўлса-да, ўз ҳаракатларимдан умуман қониқмадим. Жамоа ажойиб ўйин кўрсатди. Энди бошлаган ишимизни охирига етказиб қўйишимиз керак", — дея журналист Керри Хау Павловичнинг ўйиндан кейинги интервьюсидан иқтибос келтирмоқда.

"Реал" дарвозасига голларни Луис Диас ва Харри Кейн киритишди, Мадрид клубининг ягона жавоб тўпига эса Килиан Мбаппе муаллифлик қилди.