«Арсенал» ёзда ўз академиясининг икки нафар тарбияланувчиси билан хайрлашишга тайёр.
ВВС берган маълумотларга кўра, «тўпчилар» Майлз Льюис-Скелли ва Итан Нванери (айни дамда ижара асосида «Марсель»да ўйнамоқда) бўйича трансфер таклифларини кўриб чиқишга рози. Ҳар икки футболчи 2025 йилда клуб билан узоқ муддатли шартнома имзолаган эди.
Нванерига Дортмунднинг «Боруссия»си ва АПЛнинг бир нечта жамоалари қизиқиш билдирмоқда. Льюис-Скелли эса Премьер-лига турнир жадвалининг юқори қисмидаги клублар эътиборини тортган.
«Арсенал» ушбу икки футболчи учун жами камида 100 миллион фунт стерлинг олмоқчи. Молиявий «фэйр-плей» нуқтаи назаридан, бу маблағлар клуб учун соф фойда сифатида қайд этилади.
Шунингдек, лондонликлар Габриэл Жезус, Бен Уайт ва Габриэл Мартинеллини ҳам сотишга тайёр эканликлари айтилмоқда.
