Миланнинг «Интер» клуби матбуот хизмати жамоа сардори ва ҳужумчиси Лаутаро Мартинес жароҳат олгани ҳақида хабар берди.

«Бугун Лаутаро Мартинес Роццанодаги Humanitas институтида тиббий кўрикдан ўтди. Текширувлар натижасида аргентиналик ҳужумчининг чап оёқ болдир мушаги бироз чўзилгани аниқланди. Унинг ҳолати яқин кунларда яна бир бор қайта кўрикдан ўтказилади», — дейилади миланликлар расмий сайтида.

Эслатиб ўтамиз, «Интер» форварди яқиндагина оёқ болдирининг орқа қисмидаги жароҳатидан фориғ бўлган эди. Ўша жароҳат сабабли у қарийб бир ярим ой майдонга туша олмаганди.

Жорий мавсумда Мартинес клуб сафида барча мусобақаларда 36 та ўйинда иштирок этиб, 20 та гол урди ва 4 та голли узатмани амалга оширди. Айни дамда «Интер» А Серия турнир жадвалида 72 очко билан биринчи ўринни эгаллаб турибди.