Milanning «Inter» klubi matbuot xizmati jamoa sardori va hujumchisi Lautaro Martines jarohat olgani haqida xabar berdi.

«Bugun Lautaro Martines Rossanodagi Humanitas institutida tibbiy ko‘rikdan o‘tdi. Tekshiruvlar natijasida argentinalik hujumchining chap oyoq boldir mushagi biroz cho‘zilgani aniqlandi. Uning holati yaqin kunlarda yana bir bor qayta ko‘rikdan o‘tkaziladi», — deyiladi milanliklar rasmiy saytida.

Eslatib o‘tamiz, «Inter» forvardi yaqindagina oyoq boldirining orqa qismidagi jarohatidan forig‘ bo‘lgan edi. O‘sha jarohat sababli u qariyb bir yarim oy maydonga tusha olmagandi.

Joriy mavsumda Martines klub safida barcha musobaqalarda 36 ta o‘yinda ishtirok etib, 20 ta gol urdi va 4 ta golli uzatmani amalga oshirdi. Ayni damda «Inter» A Seriya turnir jadvalida 72 ochko bilan birinchi o‘rinni egallab turibdi.