«Челси» бош мураббийи Лиам Росеньор Англия Премьер-лигасининг 32-туридан ўрин олган «Манчестер Сити»га қарши ўйинда кимлар майдонга туша олмаслигини маълум қилди. Ушбу баҳс якшанба, 12 апрель куни бўлиб ўтади.
«Янгиликлар йўқ, аммо ижобий жиҳати шундаки, Эстевао «Порт Вейл»га қарши ўйинда (7:0) тўлиқ 90 дақиқа ҳаракат қилди. Қолган масалаларда ўзгариш йўқ. Трево [Чалоба] жуда қаттиқ ишлаяпти ва майдонга қайтди. Ливай [Колуилл] машғулотларни бошлади, лекин у ҳали айрим тўсиқлардан ўтиши керак. Рис [Жеймс] эса бугун югуриш машқларида қатнашди. Уларнинг ҳеч бири «Манчестер Сити» билан ўйинга тайёр эмас, бироқ тикланиш жараёни яхши кетмоқда.
Бизда кучли таркиб бор ва ҳамма ажойиб ҳолатда кўринмоқда. Биламан, биздан фақат ғалаба кутишганди, лекин «Порт Вейл» билан баҳсда кўрсатган ўйинимиз жуда мазмунли бўлди. Умид қиламанки, бу мавсумнинг қолган қисми учун ўзига хос трамплин вазифасини ўтайди», — дея Росеньорнинг сўзларини келтиради «Челси» расмий сайти.
