«Барселона»нинг собиқ футболчиси Тьерри Анри Ла Лига доирасида «Эспаньол»га қарши кечган ўйинда (4:1) ҳужумчи Ламин Ямалнинг кўрсатган ўйини ҳақида ўз фикрлари билан ўртоқлашди.

«Эшитинг, одамлар унинг ёши ҳақида гапиришмоқда, лекин унга қараганингизда туғилганлик ҳақидаги гувоҳномани эмас, балки майдондаги «ечим»ни кўрасиз. «Барселона»нинг бахти кулган ва улар ўз сафларида шундай йигит борлиги учун жуда омадлидирлар. Сизда Ламин каби 9-дақиқада Ферранга голли пас бериб, 25-дақиқада буни яна такрорлай оладиган футболчи бўлса, рақиб ҳали терлаб улгурмасидан ўйин тақдири ҳал бўлади.

У шунчаки футбол ўйнамайди; у майдон геометриясини ўзидан ўн ёш катта футболчилардан ҳам яхшироқ тушунади. Аслида ҳаммаси жуда оддий. Агар жума куни «Реал» таркибида мана шундай совуққонлик ва майдонни кўриш қобилиятига эга футболчи бўлганида эди, биз «Жирона» билан бўлган дуранг ҳақида гапириб ўтирмасдик. Улар майдонни ғалаба билан тарк этишган бўларди. Аммо уларда бундай ўйинчи йўқ. «Барса»да эса бор! Ва у Каталонияда», — деди Анри.

Эслатиб ўтамиз, «Эспаньол»га қарши баҳсда Ламин Ямаль битта гол урди ва иккита голли узатмани амалга оширди.