«Ливерпуль» Англия чемпионати доирасида ўз уйи — «Энфилд» стадионида 1500-ғалабасини қўлга киритди. Бу ҳақда «қизиллар»нинг расмий сайти хабар бермоқда.

Мерсисайдликлар ушбу тарихий маррани Англия Премьер-лигасининг 32-турида Лондоннинг «Фулхэм» жамоаси устидан қозонилган ғалаба (2:0) орқали забт этишди. «Энфилд»даги илк ғалаба 1892 йилнинг 3 сентябрида қайд этилган бўлиб, ўшанда мерсисайдликлар «Хайер Уолтон» жамоасини 8:0 ҳисобида тор-мор этишган эди.

Айни дамда «Ливерпуль» 52 очко билан Англия юқори дивизиони турнир жадвалида бешинчи ўринда бормоқда. Кейинги турда мерсисайдликлар 19 апрель куни сафарда «Эвертон» билан куч синашадилар. Жамоанинг АПЛ доирасидаги навбатдаги уй учрашуви эса 25 апрель куни «Кристал Пэлас»га қарши бўлиб ўтади.