«Барселона» бош мураббийи Ханс-Дитер Флик Чемпионлар лигаси 1/4 финали доирасида «Атлетико»га қарши кечадиган жавоб учрашуви ҳақида ўз фикрларини билдириб ўтди. Ўз майдонида 0:2 ҳисобида имкониятни бой берган каталонияликлар учун вазият анча мураккаб.

«Аввало, биз эртага яхши ўйин кўрсатишимиз керак. Диққатимизни натижага эмас, балки кучли ўйин намойиш этишга қаратишимиз лозим. Қачонки яхши ўйнасак, голлар ҳам албатта келади. Бу галги баҳс бошқача руҳда ўтади, бироқ ҳар қандай ҳолатда ҳам у ҳайратланарли бўлиши аниқ.

Вазиятни ўнглаш ва кейинги босқичга чиқишнинг иложи бор, нега энди йўқ? Албатта, биз жуда кучли «Атлетико»га қарши ўйнаймиз ва жуда юқори даражадаги ўйин кўрсатишимиз шарт. Вазиятлардан унумли фойдаланишимиз керак, чунки ўтган баҳсда айнан шу жиҳат фарқни юзага келтирган эди», — деди Флик журналистларга.