Шу ҳафтада «Сантос» ҳужумчиси Неймар билан янги интервью эълон қилинади. Ушбу суҳбат катта эҳтимол билан иқтибосларга бўлиниб кетади ва унда Неймарнинг Жаҳон чемпионатида иштирок этиш истаги ҳақидаги баёнотларини кутиш мумкин.
Ҳозирча эса Ziggo Sport интервьюдан айрим парчаларни намойиш этди. Улардан бирида 34 ёшли Неймар Деннис Бергкампнинг ўйини уни ҳайратга солгани ҳақида гапириб берган.
«Менга Деннис Бергкампнинг ўйинини томоша қилиш ёқарди — у майдонда ҳақиқий сеҳр яратарди», — деди Неймар.
Деннис Бергкамп фаолияти давомида «Аякс», «Интер» ва «Арсенал» каби клубларда тўп сурган.
Неймар ҳамон тарихдаги энг қиммат футболчи бўлиб қолмоқда — 2017 йилда «ПСЖ» бразилиялик учун 222 миллион евро тўлаган эди.
