«Астон Вилла» ҳужумкор ярим ҳимоячиси Морган Рожерс шу ёзда клубини ўзгартириши мумкин. Футболчига «Челси» жамоаси даъвогарлик қилмоқда. Бу ҳақда Sky Sport нашри хабар бермоқда.

Манбанинг таъкидлашича, лондонликлар трансфер шартларини муҳокама қилиш учун футболчининг вакиллари билан аллақачон боғланишган. «Астон Вилла» эса ўз ҳужумчиси учун 90 миллион фунт стерлинг олмоқчи, ваҳоланки Transfermarkt портали ярим ҳимоячини 80 миллион еврога баҳолаган.

«Челси»да Рожерс жорий мавсумда ўзини яхши кўрсатаётган Энцо Фернандеснинг ўрнини эгаллаши мумкин. Миш-мишларга кўра, аргентиналик футболчига Мадриднинг «Реал» клуби қизиқиш билдирмоқда.

Рожерснинг «Астон Вилла» билан шартномаси 2031 йилнинг ёзига қадар мўлжалланган. Жорий мавсумда унинг ҳисобида АПЛда 32 та ўйин, 8 та гол ва 6 та натижали узатма мавжуд.