«Барселона» Нидерландиялик марказий ҳимоячи, «Твенте»нинг 18 ёшли иқтидорли футболчиси Руд Нейстадга катта қизиқиш билдирмоқда. Бу ҳақда испаниялик журналист Карлос Монфорт хабар берди.

Жоао Амарал бошчилигидаги скаутлар сўнгги бир неча ой давомида Нейстадни кузатиб боришди, бироқ ҳозирча трансфер шубҳа остида қолмоқда. «Твенте» ўз ўйинчиси учун 8 миллион евро олмоқчи. «Барселона» эса бу нархни жуда юқори деб ҳисобламоқда, музокаралар давом этмоқда.

Мюнхеннинг «Бавария»си ва АПЛнинг етакчи клублари ҳам ёш футболчининг ҳаракатларини диққат билан кузатиб боришмоқда. Жорий мавсумда у асосий жамоага кириб боришга муваффақ бўлди ва 24 та ўйинда майдонга тушиб, 1 та гол ва 1 та натижали узатмани амалга оширди. Унинг «Твенте» билан шартномаси 2027 йилгача мўлжалланган.