«Реал» ярим ҳимоячиси Жуд Беллингем алкоголь билан боғлиқ муаммолари борлиги ҳақидаги миш-мишларга изоҳ берди.

Аввалроқ испаниялик ютубер AuronPlay «қаймоқранглилар»нинг инглиз ярим ҳимоячиси ичкиликка берилгани ҳақида баёнот берган эди: «Испанияда Жуд Беллингем кирмаган бирорта клуб қолмади. У алкоголни ҳаддан ташқари яхши кўради. Машғулотларда эса ундан ром ҳиди келиб, терлаб юради».

Беллингем 20 январь куни Чемпионлар Лигасида «Монако»га қарши ўйинда (6:1) гол урди ва уни қўлида қадаҳларни ифодаловчи ҳаракатлар билан нишонлади.

«Менимча, бу ҳақда аввал ҳам айтганман: шахсий ҳаёт билан футболни аралаштириб бўлмайди. Одамлар мени кўп ичади деб ёлғон гапиришди, лекин бу ҳақиқат эмас. Мен ўта профессионалман.

Ушбу [гол нишонланиши] шунчаки ҳазил эди, холос», — деди Беллингем Чемпионлар Лигаси 1/4 финали доирасида «Бавария»га қарши ўйин олдидан ўтказилган матбуот анжуманида.