Диего Симеоне «Барселона»дан навбатдаги мағлубиятни қабул қилиб олди.
Унинг бошқарувидаги «Атлетико» Чемпионлар лигаси чорак финалининг жавоб учрашувида «блауграна»га 1:2 ҳисобида имкониятни бой берди. Шунга қарамай, дастлабки ўйиндаги ғалаба эвазига мадридликлар кейинги босқичга йўл олишди.
Симеоненинг мураббийлик фаолияти давомида каталонияликларга қарши ўтказган ўйинлари сони 46 тага етди. Ушбу баҳсларнинг 26 тасида у мағлубиятга учраган, 8 тасида ғалаба қозонган ва 12 бор дуранг қайд этган.
Шу билан бирга, «Атлетико» жорий мавсумда «Барселона»ни иккита турнирдан чиқариб юборди. Бундан аввал Флик жамоаси Испания кубогида ҳам мадридликларга имкониятни бой берган эди.
