Лондоннинг «Арсенал» клуби бош мураббийи Микель Артета Чемпионлар лигаси чорак финали доирасидаги «Спортинг»га қарши жавоб учрашувида ўз футболчиларида қайси хислатни кўришни истаётганини айтди.

Испаниялик мутахассиснинг фикрича, энг асосийси — рақибдан қўрқмасдан, майдонга кўзларида ёниб турган иштиёқ билан тушишдир.

«Ўйинчиларимда нимани кўришни истайман? Ҳеч қандай қўрқув эмас, фақат олов! Тамом. Мен футболчиларда ҳам, атрофимиздаги одамларда ҳам айнан шуни кўришни хоҳлайман», — дея Артетанинг сўзларидан иқтибос келтиради УЕФА матбуот хизмати.

Унинг қўшимча қилишича, лиссабонликлар ўз майдонидаги 0:1 ҳисобидаги мағлубиятдан сўнг вазиятни ўнглаш учун майдонда доминантлик қилишга интилишади. «Арсенал»нинг вазифаси эса бунга йўл қўймасликдир, дея хулоса қилди Артета.