«Барселона» вингери Рафинья жамоанинг Чемпионлар лигасидан чиқиб кетганидан сўнг ўз фикрларини билдирди. «Атлетико»га қарши жавоб учрашувида бразилиялик футболчи жароҳати сабабли ўйнамаган бўлса-да, жамоа етакчиларидан бири сифатида улар билан бирга эди.

«Мен учун бу — талончилик. Ҳакамлик ҳақида гапиришни истамайман, лекин биз жуда яхши ўйнадик. «Атлетико» шунчалик кўп фол ишлатдики — ҳисобини билмайман — аммо ҳакам уларга бирорта ҳам сариқ карточка кўрсатмади! Мен «Барселона»га нисбатан қўлланилаётган ҳакамлик стандартларини ростдан ҳам тушунишни хоҳлайман. Мен буни тушунмаяпман», — дея Рафиньянинг сўзларидан иқтибос келтиради The Touchline.

«Барселона» сафарда «Атлетико»ни 2:1 ҳисобида мағлуб этди, бироқ икки ўйин натижасига кўра каталонияликлар 2:3 ҳисобида имкониятни бой беришди.