«Barselona» vingeri Rafinya jamoaning Chempionlar ligasidan chiqib ketganidan so‘ng o‘z fikrlarini bildirdi. «Atletiko»ga qarshi javob uchrashuvida braziliyalik futbolchi jarohati sababli o‘ynamagan bo‘lsa-da, jamoa yetakchilaridan biri sifatida ular bilan birga edi.

«Men uchun bu — talonchilik. Hakamlik haqida gapirishni istamayman, lekin biz juda yaxshi o‘ynadik. «Atletiko» shunchalik ko‘p fol ishlatdiki — hisobini bilmayman — ammo hakam ularga birorta ham sariq kartochka ko‘rsatmadi! Men «Barselona»ga nisbatan qo‘llanilayotgan hakamlik standartlarini rostdan ham tushunishni xohlayman. Men buni tushunmayapman», — deya Rafinyaning so‘zlaridan iqtibos keltiradi The Touchline.

«Barselona» safarda «Atletiko»ni 2:1 hisobida mag‘lub etdi, biroq ikki o‘yin natijasiga ko‘ra kataloniyaliklar 2:3 hisobida imkoniyatni boy berishdi.