«Барселона» бош мураббийи Ханс-Дитер Флик Чемпионлар лигаси чорак финалида Мадриднинг «Атлетико» клубига қарши баҳсдаги муваффақиятсизликнинг асосий сабабларини айтиб ўтди.

Каталония жамоаси Мадридда 2:1 ҳисобида ғалаба қозонди, бироқ бу етарли бўлмади — илк учрашувда «матрасчилар» 2:0 ҳисобида зафар қучишган эди.

«Албатта, биз ҳафсаламиз пир бўлди. Чемпионлар лигасида ғолиб чиқиш бизнинг орзумиз эди. Барчамиз — ўйинчилар ҳам, мураббийлар штаби ҳам бундан сабоқ олишимиз керак. Биз кўпроқ гол уришимиз шарт эди — бунинг учун бизда етарлича имкониятлар бўлди. Ярим финалга чиқишга лойиқ эдик. Биринчи ўйинда жуда кўп вазиятларни бой бердик. Асосий муаммо ҳам шунда — ўз майдонимиздаги баҳснинг ёмон натижаси», — деди Флик матбуот анжуманида.