«Реал» Чемпионлар Лигасида «Бавария» тўсиғидан ўта олмади. Альваро Арбелоа жамоаси Мюнхенда уч бор ҳисобда олдинда борганига қарамай, якунда 3:4 ҳисобида мағлубиятга учради. Ўйиндан сўнг Арбелоа натижа учун масъулиятни ўз зиммасига олди ва келажаги борасидаги қарорни клуб раҳбарияти чиқаришини таъкидлади.

«Бу мағлубият учун мен жавобгарман. Бундай вазиятларда доимо масъулиятни ўз зиммамга оламан, чунки футболчилар борини беришди. Мен бу ерга ўз даражамни исботлаш учун эмас, балки ўйинчиларга ёрдам бериш учун келганман.

Биз Гвардиоланинг «Манчестер Сити»сига, Компанининг «Бавария»сига, Симеоненинг «Атлетико»сига қарши ўйнадик ва мен доимо жамоага ёрдам беришга ҳаракат қилдим. Келажагим борасида умуман хавотирда эмасман», — деди Арбелоа журналистларга.

Эслатиб ўтамиз, Альваро Арбелоа январь ойи ўрталаридан буён «Реал»ни бошқариб келмоқда. Унинг тақдири энди мавсум якунларига боғлиқ бўлиши мумкин.