«Real» Chempionlar Ligasida «Bavariya» to‘sig‘idan o‘ta olmadi. Alvaro Arbeloa jamoasi Myunxenda uch bor hisobda oldinda borganiga qaramay, yakunda 3:4 hisobida mag‘lubiyatga uchradi. O‘yindan so‘ng Arbeloa natija uchun mas’uliyatni o‘z zimmasiga oldi va kelajagi borasidagi qarorni klub rahbariyati chiqarishini ta’kidladi.

«Bu mag‘lubiyat uchun men javobgarman. Bunday vaziyatlarda doimo mas’uliyatni o‘z zimmamga olaman, chunki futbolchilar borini berishdi. Men bu yerga o‘z darajamni isbotlash uchun emas, balki o‘yinchilarga yordam berish uchun kelganman.

Biz Gvardiolaning «Manchester Siti»siga, Kompanining «Bavariya»siga, Simeonening «Atletiko»siga qarshi o‘ynadik va men doimo jamoaga yordam berishga harakat qildim. Kelajagim borasida umuman xavotirda emasman», — dedi Arbeloa jurnalistlarga.

Eslatib o‘tamiz, Alvaro Arbeloa yanvar oyi o‘rtalaridan buyon «Real»ni boshqarib kelmoqda. Uning taqdiri endi mavsum yakunlariga bog‘liq bo‘lishi mumkin.