«Бавария» дарвозабони Мануэль Нойер Чемпионлар лигасининг «Реал Мадрид»га қарши кечган сўнгги учрашувида жамоанинг асосий таркибидан жой олди.

40 ёшли футболчи учун ушбу ўйин Европанинг энг нуфузли клублар турнирида «Бавария» либосида асосий таркибда майдонга тушган 137-баҳс бўлди. Ушбу кўрсаткич бўйича Нойер «Барселона»нинг собиқ ҳужумчиси Лионель Мессидан ўзиб кетди — аргентиналик юлдуз каталонияликлар сафида 136 бор асосий таркибда майдонга тушган.

Ҳозирги вақтда Нойер бир жамоа сафида Чемпионлар лигаси ўйинларини асосий таркибда бошлаш бўйича иккинчи ўринни эгаллаб турибди. Бу борада «Реал»нинг собиқ посбони Икер Касильяс (149 та ўйин) етакчилик қилмоқда.

Эслатиб ўтамиз, Чемпионлар лигаси чорак финалининг жавоб учрашувида «Бавария» ўз уйида «Реал»ни 4:3 ҳисобида мағлуб этиб, кейинги босқичга йўл олди.