«Барселона» президенти Жоан Лапорта Чемпионлар лигаси чорак финалидан ўрин олган «Атлетико»га қарши баҳслардаги ҳакамлик масаласида УЕФА раҳбари Александер Чеферинга шахсан қўнғироқ қилди.

Бу ҳақда Mundo Deportivo нашри хабар бермоқда. Таъкидланишича, Лапорта суҳбат давомида ҳакамлар ишидан норозилигини билдирган.

Бундан ташқари, «Метрополитано»даги жавоб ўйинининг танаффус вақтида Лапорта УЕФА бош котиби Теодор Теодоридис ва унинг ўринбосари Жоржо Маркеттини учратиб қолган. Лапорта уларга яқинлашиб, нафақат бош ҳакам Клеман Тюрпеннинг биринчи бўлимдаги қарорларидан — хусусан, Дани Ольмога нисбатан белгиланмаган пенальти ва Хуан Муссонинг Фермин Лопесга қарши ўйинидан шикоят қилган, балки биринчи учрашувдаги Иштван Ковачнинг ишига ҳам эътироз билдирган.

Шунингдек, каталонияликлар раҳбари УЕФА функционерларини «Барселона» томонидан биринчи ўйинда Марк Пубилнинг ўз жарима майдончасида тўпни қўли билан ўйнагани бўйича берилган расмий протестни қабул қилиб бўлмас деб топганликлари учун танқид қилди.