Мадриднинг «Реал» клуби ҳужумчи Винисиус Жуниор билан шартномани узайтиришни режалаштирмоқда.
Бразилиялик футболчининг шартномаси якунланишига бир йилдан сал кўпроқ вақт қолган бўлса-да, сўнгги пайтларда унинг кетиши ҳақидаги миш-мишлар анча тинди. Таниқли инсайдер Фабрицио Романонинг таъкидлашича, «қироллик клуби» президенти Флорентино Перес юлдуз ҳужумчининг жамоада қолишини жуда истамоқда. Футболчи аллақачон таклиф олган, айни дамда музокаралар давом этмоқда. Июль ойида Винисиус 26 ёшга тўлади.
Жорий мавсумда ҳужумчи «Реал» сафида барча турнирларда 47 та ўйинда майдонга тушиб, ўз ҳисобига 14 та гол ва 12 та голли узатмани ёздириб қўйди. Transfermarkt портали футболчининг трансфер қийматини 150 миллион еврога баҳоламоқда.
