«Брайтон» раҳбарияти шу мавсум давомида бир неча бор Ян-Паул ван Хеккени яхшиланган шартлар асосида янги шартнома имзолашга кўндиришга уринди. Бу ҳақда Voetbal International нашри хабар бермоқда.

Манбанинг маълумотларига кўра, футболчи «чайкалар» томонидан берилган барча таклифларни рад этган. 25 ёшли нидерландиялик ҳимоячи Премьер-лиганинг топ-клубида ўйнаш ва еврокубокларда иштирок этишни орзу қилмоқда. У ўз фаолиятида кейинги қадамни ташлашга қатъий қарор қилган.

Ван Хекке 2020 йилдан бери «Брайтон» шарафини ҳимоя қилиб келмоқда. Жорий мавсумда у барча турнирларда 34 та ўйинда майдонга тушди, 3 та гол урди ва ўз ҳисобига 2 та голли узатмани ёздириб қўйди.

Ҳимоячининг «Брайтон» билан амалдаги шартномаси 2027 йилнинг ёзига қадар мўлжалланган. Transfermarkt экспертлари футболчининг қийматини 35 миллион еврога баҳолашмоқда.