Ўтмишнинг машҳур футболчиси Андрей Шевченко ҳозирда Украина футбол ассоциацияси (УФА) президенти сифатида фаолият юритмоқда. Шевченконинг сўзларига кўра, у ФИФА президенти Жанни Инфантино билан суҳбатлашган ва ундан Россияга қўйилган футбол санкцияларини олиб ташлаш масаласи ҳозирда кўриб чиқилмаётганини билиб олган.
Шу билан бирга, Шевченко қачондир Россия жамоалари расмий мусобақаларга қайтиши мумкинлигини истисно этмади.
«Агар россияликлар қайтадиган бўлса — бизда ҳаракатлар режаси бор, лекин келинг, шошилмайлик. Агар бизга нимадир таҳдид соладиган вазият юзага келса, унда ҳаракат қиламиз», — дея Шевченконинг сўзларини келтиради «Чемпион» нашри.
Маълумки, УЕФА ва ФИФА Россия футбол иттифоқига (РФИ) нисбатан тўрт йилдан кўпроқ вақт олдин санкциялар жорий қилган эди. Кўринишидан, яқин келажакда бу санкциялар бекор қилинмайди. Россия терма жамоаси ҳозирда фақат ўртоқлик учрашувлари ўтказиш билан чекланмоқда.
