«Сантос» ҳужумчиси Неймар «Барселона» вингери Ламин Ямал эришаётган муваффақиятлар ҳақида ўз фикрини билдирди. Бразилиялик юлдуз «кўк-анорранглилар»нинг 18 ёшли футболчиси кўрсатаётган ўйиндан ҳайратда эканини тан олди.

«Мен Ямални барча даврларнинг энг буюк ёш спортчиларидан бири деб ҳисоблайман. Месси бўлган, мен бўлганман, лекин бу йигитнинг 18 ёшида қилаётган ишлари — ақл бовар қилмас даражада. У «Барселона» билан Чемпионлар лигасидан чиқиб кетганида жуда хафа бўлдим. Ламин жамоани ўз ортидан эргаштирди ва ҳисобни тенглаштиришга ёрдам берди, лекин бу футбол. Унинг вақти ҳали келади. Умид қиламанки, у келаси йили Чемпионлар лигасида ғолиб чиқади. Балки «Олтин тўп»ни ҳам ютар, нега энди йўқ? Мен уни доимо қўллаб-қувватлайман», — дея Неймарнинг сўзларини Actu Foot нашри келтиради.

Эслатиб ўтамиз, «Барселона» Чемпионлар лигасининг 1/4 финал босқичида «Атлетико»га имкониятни бой бериб, мусобақа билан хайрлашган эди.