«ПСЖ» ярим ҳимоячиси Фабиан Руис жароҳатидан сўнг майдонга қайтишга тайёр. Испаниялик футболчи тиззасидаги жароҳат сабабли 20 январдан бери ўйинларда иштирок этмаётган эди.
Парижликлар бош мураббийи Луис Энрикенинг сўзларига кўра, хавбек жароҳатидан тўлиқ фориғ бўлган ва тез орада майдонга тушиши мумкин.
«Фабиан Руис яхши спорт формасига кириб олди, у ушбу ҳафтада жамоа билан бирга машғулот ўтказди. Эртага у қайдномада бўлади. Агар ҳаммаси яхши кечса, у сафга қайтганидан кейинги илк дақиқаларини олади», — деди Энрике якшанба куни «Лион»га қарши бўлиб ўтадиган ўйин олдидан ўтказилган матбуот анжуманида.
Учрашув Тошкент вақти билан соат 23:45 да старт олади. Айни дамда «ПСЖ» турнир жадвалида пешқадамлик қилмоқда ва «Ланс»ни бир очкога ортда қолдирмоқда.
