«PSJ» yarim himoyachisi Fabian Ruis jarohatidan so‘ng maydonga qaytishga tayyor. Ispaniyalik futbolchi tizzasidagi jarohat sababli 20 yanvardan beri o‘yinlarda ishtirok etmayotgan edi.
Parijliklar bosh murabbiyi Luis Enrikening so‘zlariga ko‘ra, xavbek jarohatidan to‘liq forig‘ bo‘lgan va tez orada maydonga tushishi mumkin.
«Fabian Ruis yaxshi sport formasiga kirib oldi, u ushbu haftada jamoa bilan birga mashg‘ulot o‘tkazdi. Ertaga u qaydnomada bo‘ladi. Agar hammasi yaxshi kechsa, u safga qaytganidan keyingi ilk daqiqalarini oladi», — dedi Enrike yakshanba kuni «Lion»ga qarshi bo‘lib o‘tadigan o‘yin oldidan o‘tkazilgan matbuot anjumanida.
Uchrashuv Toshkent vaqti bilan soat 23:45 da start oladi. Ayni damda «PSJ» turnir jadvalida peshqadamlik qilmoqda va «Lans»ni bir ochkoga ortda qoldirmoqda.
