«Челси» ҳужумчиси Лиам Делап Премьер-лиганинг 33-туридан ўрин олган «Манчестер Юнайтед»га қарши ўйинда ҳам рақиб дарвозасини ишғол эта олмай, ўз голсиз сериясини давом эттирди.

23 ёшли футболчи шанба кунги баҳсда асосий таркибда майдонга тушди ва финал ҳуштагигача ўйнади. Ҳужумчи дарвоза томон икки бор зарба берди, бироқ «кўклар»нинг ўз уйидаги мағлубиятдан (0:1) қутулиб қолишига ёрдам бера олмади. Шу тариқа, Делап барча мусобақаларда кетма-кет 20 та ўйиндан бери гол ура олмаяпти.

Инглиз футболчисининг сўнгги голи 7 январь санасига тўғри келади — ўшанда у 21-тур доирасидаги «Фулхэм»га қарши кечган ва мағлубият (1:2) билан якунланган баҳсда ўз номини таблога ёздириб қўйган эди. Лиам Делап ўтган йилнинг ёзида «Ипсвич»дан 35,5 миллион евро эвазига «Челси»га ўтган эди. Унинг шартномаси 2030/31 йилги мавсум якунига қадар мўлжалланган.