«Челси» бош мураббийи Лиам Росеньор «Манчестер Юнайтед»га қарши баҳсда Эстевао Виллиан олган жароҳат ҳақида маълумот берди. 18 ёшли вингер учрашувнинг 16-дақиқасидаёқ майдонни мажбурий тарзда тарк этди — унинг ўрнига Алехандро Гарначо ўйинга қўшилди.

«Эстевао танаффус пайтида йиғлаётган эди. У яна тизза ости пайини жароҳатлаб олди», — деди Росеньор ўйиндан кейинги матбуот анжуманида.

«Кўклар» ўз уйларида «қизил иблислар»га минимал ҳисобда имкониятни бой беришди. Учрашувдаги ягона гол 43-дақиқада Матеус Кунья томонидан киритилди.

Эслатиб ўтамиз, Эстевао аввалроқ худди шундай жароҳат туфайли бир ойни ўтказиб юборган ва февраль охиридан март охиригача майдонга тушмаган эди. Жорий мавсум бразилиялик футболчи учун Европа футболидаги дебют мавсум ҳисобланади.