«Chelsi» bosh murabbiyi Liam Rosenyor «Manchester Yunayted»ga qarshi bahsda Estevao Villian olgan jarohat haqida ma’lumot berdi. 18 yoshli vinger uchrashuvning 16-daqiqasidayoq maydonni majburiy tarzda tark etdi — uning o‘rniga Alexandro Garnacho o‘yinga qo‘shildi.
«Estevao tanaffus paytida yig‘layotgan edi. U yana tizza osti payini jarohatlab oldi», — dedi Rosenyor o‘yindan keyingi matbuot anjumanida.
«Ko‘klar» o‘z uylarida «qizil iblislar»ga minimal hisobda imkoniyatni boy berishdi. Uchrashuvdagi yagona gol 43-daqiqada Mateus Kunya tomonidan kiritildi.
Eslatib o‘tamiz, Estevao avvalroq xuddi shunday jarohat tufayli bir oyni o‘tkazib yuborgan va fevral oxiridan mart oxirigacha maydonga tushmagan edi. Joriy mavsum braziliyalik futbolchi uchun Yevropa futbolidagi debyut mavsum hisoblanadi.
