Мадриднинг «Реал» клуби собиқ юлдузи Луиш Фигу жамоа жорий мавсумни аллақачон бой бериб бўлди деб ҳисоблайди. «Қаймоқранглилар» Чемпионлар Лигаси чорак финалида «Бавария»га имкониятни бой бериб, мусобақадаги иштирокларини якунлашди, Испания Кубогининг 1/8 финалида эса кутилмаганда «Альбасете»га мағлуб бўлиб, турнирни тарк этишди.
Ла Лига чемпионлиги учун курашиш ҳам анча мушкул вазифа бўлиб турибди, чунки мавсум якунланишига етти тур қолганда «Барселона» билан орадаги фарқ тўққиз очкони ташкил қилмоқда.
"Тан олиш керак, бу "Реал" учун муваффақиятсиз мавсум. Бундай клубда агар жамоа ғалаба қозонмаса, ҳар қандай мавсум омадсиз ҳисобланади. Совринларнинг йўқлиги — "Реал"да нимадир ишламаётганидан далолат", — дея Фигунинг сўзларини келтирмоқда Madrid Zone.
Сешанба куни Альваро Арбелоа шогирдлари чемпионат доирасида «Алавес»га қарши баҳс олиб боради.
