Madridning «Real» klubi sobiq yulduzi Luish Figu jamoa joriy mavsumni allaqachon boy berib bo‘ldi deb hisoblaydi. «Qaymoqranglilar» Chempionlar Ligasi chorak finalida «Bavariya»ga imkoniyatni boy berib, musobaqadagi ishtiroklarini yakunlashdi, Ispaniya Kubogining 1/8 finalida esa kutilmaganda «Albasete»ga mag‘lub bo‘lib, turnirni tark etishdi.

La Liga chempionligi uchun kurashish ham ancha mushkul vazifa bo‘lib turibdi, chunki mavsum yakunlanishiga yetti tur qolganda «Barselona» bilan oradagi farq to‘qqiz ochkoni tashkil qilmoqda.

"Tan olish kerak, bu "Real" uchun muvaffaqiyatsiz mavsum. Bunday klubda agar jamoa g‘alaba qozonmasa, har qanday mavsum omadsiz hisoblanadi. Sovrinlarning yo‘qligi — "Real"da nimadir ishlamayotganidan dalolat", — deya Figuning so‘zlarini keltirmoqda Madrid Zone.

Seshanba kuni Alvaro Arbeloa shogirdlari chempionat doirasida «Alaves»ga qarshi bahs olib boradi.