Бирлашган Араб Амирликларида марказлаштирилган тартибда ўтказилаётган Осиё Чемпионлар лигаси 2 мусобақасининг Ғарб минтақасида иккинчи ярим финалчи номи маълум бўлди.

Чорак финалнинг сўнгги баҳсида Қатарнинг «Ал-Аҳли» жамоаси Иорданиянинг «Ал-Ҳусайн» клубига қарши майдонга тушди ва 3:1 ҳисобида ғалаба қозониб, ярим финал йўлланмасини қўлга киритди.

Учрашувнинг 2-дақиқасидаёқ Экспосито ҳисобни очган бўлса, 21-дақиқада Қаши мувозанатни тиклади. Иккинчи бўлимда қатарликлар босимни оширишди ва 65-дақиқада Юлиан Дракслер жамоасини олдинга олиб чиқди. Баҳсга қўшиб берилган дақиқаларда Влап пенальтини аниқ амалга ошириб, якуний ҳисобни белгилади.

Эндиликда «Ал-Аҳли» жамоаси финал йўлланмаси учун 22 апрель куни Саудия Арабистонининг «Ан-Наср» клубига қарши баҳс олиб боради. Ушбу жуфтлик ғолиби финал учрашувида Шарқ минтақаси вакили — Япониянинг «Гамба Осака» жамоаси билан бош соврин учун курашади.

ОЧЛ-2. Чорак финал

«Ал-Аҳли» (Қатар) — «Ал-Ҳусайн» (Иордания) — 3:1

Голлар: Экспосито (2), Дракслер (65), Влап (90+7, пен.) — Қаши (21).