Кеча, 19 апрель куни Англия Премьер-лигасининг 33-тури доирасида «Манчестер Сити» ва «Арсенал» жамоалари ўртасидаги баҳс бўлиб ўтди. Манчестердаги «Этиҳад» стадионида кечган ўйинда «шаҳарликлар» 2:1 ҳисобида ғалаба қозонишди.
Бу ғалаба «Манчестер Сити» бош мураббийи Хосеп Гвардиола учун «Арсенал» устидан қозонилган 22-ғалаба бўлди ва бу унинг мураббийлик фаолиятидаги (илгари «Барселона» ва «Бавария»ни бошқарган) энг юқори кўрсаткичдир.
Ушбу ўйиндан сўнг «Манчестер Сити» 67 очко билан турнир жадвалида иккинчи ўринда бормоқда, «Арсенал» эса 70 очко билан пешқадамликни давом эттирмоқда. Таъкидлаш жоизки, Гвардиола жамоасида ҳали битта захира ўйини мавжуд.
Келгуси турда «шаҳарликлар» 22 апрель куни сафарда «Бёрнли» билан куч синашади, «тўпчилар» эса 25 апрель куни «Ньюкасл Юнайтед»ни қабул қилади.
