Испаниянинг «Жирона» клуби яримҳимоячиси Клаудио Эчеверри жамоадаги кадрлар муаммоси сабабли марказий ҳужумчи позициясида ўйнашда давом этади.
2026 йилнинг январь ойида «Манчестер Сити»дан ижарага олинган 20 ёшли аргентиналик ҳужумкор ярим ҳимоячи Ла Лиганинг 31-туридан ўрин олган «Реал Мадрид»га қарши баҳсда (1:1) «ёлғончи тўққизлик» вазифасини бажарган эди.
Жамоа бош мураббийи Мичел Санчес ҳужумчилар Владислав Ванат ва Абель Руиснинг жароҳатлари, шунингдек, Кристиан Стуанининг ўйинга тўлиқ тайёр эмаслиги сабабли Эчеверрини мавсум якунига қадар ушбу позицияда синаб кўришга мажбур бўлмоқда.
Маълумот ўрнида таъкидлаш жоизки, украиналик ҳужумчи Владислав Ванат «Вильярреал» билан ўйинда олган жароҳати туфайли мавсумни муддатидан олдин якунлаган. Абель Руис эса айнан «Реал» билан баҳсда Эчеверрининг ўрнига захирадан майдонга тушгач, шикастланган эди.
Клаудио Эчеверри жорий мавсумда «Жирона» сафида барча мусобақаларда 10 та учрашувда майдонга тушиб (324 дақиқа), 1 та гол ва 1 та голли узатмани амалга оширган.
