Марказлашган тартибда ўтказилаётган футбол бўйича Элит Осиё Чемпионлар лигасининг ҳал қилувчи палласи бошланди. Мусобақанинг ярим финал босқичидан ўрин олган дастлабки учрашувда қитъамизнинг икки кучли жамоаси — Жидданинг «Ал-Аҳли» ҳамда Япониянинг «Виссел Кобе» клублари ўзаро баҳс олиб борди.

Муросасиз кечган беллашувнинг биринчи бўлимида япониялик футболчилар ташаббусни ўз қўлларига олиб, ҳисобни очишга муваффақ бўлишди. Бироқ учрашувнинг иккинчи ярмида амалдаги чемпион — Саудия Арабистони клуби ирода намойиш этиб, вазиятни ўз фойдасига ўзгартира олди. Галено ҳамда Тоуни томонидан киритилган голлар «Ал-Аҳли» жамоасига 2:1 ҳисобидаги муҳим ғалабани тақдим этди.

Шу тариқа, Жидда клуби қаторасига иккинчи бор ушбу нуфузли турнирнинг финалига йўл олди.

Элит ОЧЛ. Ярим финал
«Виссел Кобе» (Япония) – «Ал-Аҳли» (Саудия Арабистони) – 1:2
Голлар: Муто (31) – Галено (62), Тоуни (70).