Данияда пичоқ билан қилинган ҳужум натижасида “Мидтюлланд” клубининг гвинеялик ярим ҳимоячиси Аламара Жаби икки марта жарроҳлик амалиётини ўтказди. Бу ҳақда клуб матбуот хизмати маълум қилди.

Кўнгилсиз ҳодиса ўтган дам олиш кунлари Хернинг шаҳрида содир бўлган. Футболчи шифохонага ўта оғир аҳволда олиб келинган ва зудлик билан операция қилинган.

“У яна бир операцияни ўтказди. Қутқарувчилар, сўнгра шифокорларнинг профессионал ҳаракатлари туфайли унинг аҳволи ҳозирда барқарор. У сунъий кома ҳолатидан чиқди ва мавжуд вазиятни ҳисобга олган ҳолда ўзини яхши ҳис қилмоқда”, дейилади хабарда.

Маълумот учун, Жаби 19 ёшда. У 2025 йилнинг сентябридан буён “Мидтюлланд” шарафини ҳимоя қилиб келмоқда. Жорий мавсумда футболчи турли турнирларда саккизта ўйинда майдонга тушди, бироқ самарали ҳаракатларни амалга оширмади.

Ҳозирда “Мидтюлланд” Дания Суперлигасининг “А” гуруҳида иккинчи ўринда бормоқда. Жамоа сўнгги бор 2024 йилда чемпионликни қўлга киритган эди ва айни дамда пешқадам АГФ жамоасидан икки очко ортда қолмоқда.

Аввалроқ, Гана чемпионатининг “Берекум Челси” клуби ҳужумчиси Доминик Фримпонг жамоа автобусига уюштирилган қуролли ҳужум оқибатида вафот этган эди.