Мадриднинг «Реал» клуби бош мураббийи Альваро Арбелоа ўз келажаги борасидаги навбатдаги саволларга жавоб қайтарди. Сўнгги вақтларда тарқалган хабарларга кўра, испаниялик мутахассис мавсум якунида лавозимини тарк этиши кутилмоқда ва клуб раҳбарияти аллақачон янги номзодларни кўриб чиқмоқда.

Шу йилнинг январь ойида Хаби Алонсонинг ўрнини эгаллаган Арбелоа айни дамда фақат жамоа натижаларига эътибор қаратганини таъкидлади.

«Ёзда мен билан нима содир бўлиши мени ташвишга солмайди. Ҳозир фақат «Реал» ҳақида ўйлаяпман», — дея мураббийнинг сўзларини келтиради Madrid Zone нашри.

Эслатиб ўтамиз, сешанба куни «қаймоқранглилар» Ла Лига доирасида кечган учрашувда «Алавес» устидан 2:1 ҳисобида ғалаба қозонишди. Бироқ Мадрид клуби ўтган ҳафта Чемпионлар лигасининг чорак финалида икки ўйин натижасига кўра «Бавария»га (4:6) имкониятни бой бериб, мусобақани тарк этган эди.