Мадриднинг «Реал» клуби бош мураббийи Альваро Арбелоа жамоа ҳимоячиси Даниэль Карвахалнинг Испания терма жамоасига қайтиш имкониятлари ҳақидаги саволга жавоб берди.
34 ёшли футболчи бўлажак жаҳон чемпионатини ўтказиб юбориш хавфи остида қолмоқда. «Қаймоқранглилар» сардори жароҳатлари сабабли ўтган йилнинг сентябрь ойидан буён «қизил фурия» сафига чақирилмаётган эди. ОАВ вакиллари мураббийдан ветеран футболчи ЖЧ-2026 олдидан формага кириб олиши учун унга кўпроқ ўйин амалиёти бериладими ёки йўқми, деб сўрашди.
Арбелоа матбуот анжуманида бунга қуйидагича муносабат билдирди:
«Таркибимизда жаҳон чемпионатига бориши мумкин бўлган 20 га яқин футболчи бор. Агар рухсат берсангиз, мен терма жамоа эмас, кўпроқ «Реал» учун нима яхшироқ экани ҳақида ўйлашни афзал кўраман», — деди мутахассис.
Маълумот учун, Испания терма жамоаси ЖЧ-2026 гуруҳ босқичида Кабо-Верде, Саудия Арабистони ва Уругвай терма жамоаларига қарши баҳс олиб боради.
