Мадриднинг «Реал» клуби ҳужумчиси Килиан Мбаппе Ла Лиганинг 33-тури доирасида кечган «Алавес»га қарши баҳсдан (2:1) сўнг рақиб жамоа бош мураббийи Кике Флоресга ўз либосини совға қилди.
Жаҳон чемпиони мазкур учрашувда ҳисобни очиб, жамоасининг ғалабасига муҳим ҳисса қўшди. Ўйиндан сўнг «Сантьяго Бернабеу» стадионида қизиқ воқеа юз берди: Мбаппе либосини ечиб, уни 61 ёшли испаниялик мутахассисга тақдим этди.
Кике Флорес миннатдорчилик белгиси сифатида кафтини кўксига қўйиб, Килиан билан қўл бериб кўришди. Шундан сўнг мураббий қимматбаҳо эсдаликни ёрдамчиларидан бирига топширди.
