Оммавий ахборот воситаларида Германия терма жамоаси бош мураббийи Юлиан Нагельсманн «Манчестер Юнайтед»ни бошқариши мумкинлиги ҳақида маълумотлар пайдо бўлди.
TalkSPORT берган маълумотларга кўра, «Манчестер Юнайтед»даги манбалар немис мутахассисининг «қизил иблислар» билан ишлаш эҳтимолини паст баҳоламоқдалар. Ҳозирда у «МЮ» устози лавозимига реал номзод сифатида кўрилмаяпти.
Бунга асосий сабаб сифатида унинг Жаҳон чемпионати тугагунга қадар «Манчестер Юнайтед»да иш бошлай олмаслиги кўрсатилган. «Қизил иблислар» раҳбарияти Нагельсманннинг тайинланишини июль ойигача кутишни истамаяпти.
Айни дамда «Манчестер Юнайтед» Англия чемпионати турнир жадвалида учинчи ўринни эгаллаб турибди. Январь ойидан бери жамоани Майкл Кэррик бошқариб келмоқда.
