«Барселона» ярим ҳимоячиси Педри жамоадоши Френки де Йонгни клуб тарихида энг кўп ўйин ўтказган нидерландиялик футболчига айлангани билан табриклади.
28 ёшли хавбек «Сельта»га қарши баҳсда «кўк-анорранглилар» либосидаги 293-учрашувини ўтказди ва бу борада нидерландиялик футболчилар ўртасида мутлақ рекордчига айланди. Ушбу тарихий натижа муносабати билан «Камп Ноу» стадионида махсус тақдирлаш маросими ташкил этилди.
«Френкини ушбу рекорд билан табрикламоқчиман. Бундай воқеалар ҳар куни ҳам содир бўлавермайди ва унинг сафимизда эканидан жуда хурсандман. Умид қиламанки, уни «Барселона» либосида ҳали кўплаб ўйинлар кутиб турибди», — деди Педри.
Эътиборлиси, ёш испаниялик иқтидор соҳиби де Йонгни табриклаш учун бераётган интервьюсини ҳам тўхтатиб турган.
