«Манчестер Сити» ярим ҳимоячиси Бернарду Силва Премьер-лигада ғалаба қозонилган ўйинлар сони бўйича клубнинг мутлақ рекордчисига айланди. Чоршанба куни португалиялик футболчи «шаҳарликлар»нинг «Бёрнли» устидан қозонилган сафардаги ғалабасида (1:0) тўлиқ 90 дақиқа ҳаракат қилиб, жамоасига ёрдам берди.
City Xtra хабарига кўра, бу ярим ҳимоячи учун «Манчестер Сити» таркибида АПЛ доирасидаги 215-ғалаба бўлди ва бу янги клуб рекорди сифатида қайд этилди. Жамоанинг амалдаги сардори бу кўрсаткич бўйича испаниялик собиқ юлдуз Давид Сильвани (214) ортда қолдирди. Шунингдек, кучли бешликдан Эдерсон (205), Кевин де Брёйне (197) ва Фернандиньо (187) ўрин олган.
Бернарду Силва 2017 йилдан буён Манчестер клуби шарафини ҳимоя қилиб келмоқда, бироқ жорий мавсум якунида эркин агент сифатида жамоани тарк этиши кутилмоқда.
