«Бавария» ҳужумчиси Харри Кейн Германия Кубоги ярим финалида «Байер» устидан қозонилган ғалабадан (2:0) сўнг ўз таассуротлари билан ўртоқлашди. Англиялик футболчи учрашувнинг 22-дақиқасида ҳисобни очган бўлса, баҳс якунида Луис Диас якуний натижани белгилади.

«Биз ўйин бошидан охиригача ажойиб ҳаракат қилдик, яхши прессинг уюштирдик ва тўпни юқорироқда олиб қўйишга эришдик. Бизда кўпроқ гол уриш ва ўйин тақдирини анча эртароқ ҳал қилиш имконияти бор эди. «Байер» кўп вазият ярата олмади, биз ҳақли равишда ғалаба қозондик. Мавсум бошиданоқ Германия Кубогида зафар қучиш асосий мақсадларимиздан бири эканини айтгандик. Йигитлар Берлиндаги финал ўйини нақадар ажойиб тажриба эканини сўзлаб беришганди. У ерга бораётганимиздан хурсандман», — дея Кейннинг сўзларини келтиради Bayern & Germany.

«Бавария»нинг финалдаги рақиби бугун бўлиб ўтадиган «Штутгарт» ва «Фрайбург» жамоалари ўртасидаги баҳсдан сўнг маълум бўлади.